گھر میں فائرنگ، 4 افراد زخمی ، حملہ آور نے خود کو بھی زخمی کر لیا

کراچی میں ایک گھر میں فائرنگ ہوئی جس کے نتیجے میں ایک مرد اور 3 خواتین سمیت 4 افراد زخمی ہوئے۔ حملہ آور نے خود کو بھی گولی مار کر زخمی کر لیا ہے۔

تفصیلات کے مطابق فائرنگ کا یہ واقعہ کراچی کے علاقے گلستانِ جوہر میں پیش آیا۔ ایس ایچ او گلستانِ جوہر کا کہنا ہے کہ بلاک نمبر 14 میں واقع مکان میں منصور نامی شخص نے فائرنگ کی۔

یہ بھی پڑھیں:

بیس کروڑ روپے مالیت کی نایاب چیتا چھپکلیوں کی اسمگلنگ ناکام

ایس ایچ او گلستانِ جوہر نے کہا کہ ملزم نے اپنے سسرال میں فائرنگ کی اور 4 افراد کو زخمی کردیا۔ ملزم کا زخمی ہونے والے افراد کے خلاف خلع کا تنازعہ چل رہا ہے۔ 

گلستانِ جوہر کے ایس ایچ او نے کہا کہ فائرنگ کے نتیجے میں اس کا 55 سالہ سسر سہیل احمد، 51 سالہ ساس شاہین بیگم، 25 سالہ بیوی شہزین اور بیوی کی پھوپی افشاں زخمی ہوئے۔

انہوں نے کہا کہ ملزم نے خود کو بھی گولی مار کر زخمی کیا۔ ملزم سمیت پانچوں زخمیوں کو علاج معالجے کیلئے ہسپتال منتقل کردیا گیا ہے۔ واقعے کی مزید تفتیش جاری ہے۔

پولیس کا کہنا ہے کہ زخمی ہونے والے سسر سہیل احمد نے اپنے داماد ملزم منصور کے خلاف 13 جون کو مقدمہ نمبر 529 بجرم دفعہ 25 ٹیلی گراف ایکٹ درج کرایا تھا۔