اٹک کی عدالت سے بری صحافی عمران ریاض نے چکوال پولیس کو گرفتاری دیدی

لاہور: پنجاب حکومت کی جانب سے معروف صحافی کی ماورائے عدالت گرفتاری پر کوئی بیان سامنے نہ آسکا، اٹک کی عدالت سے بری عمران ریاض نے چکوال پولیس کو رضاکارانہ طور پر گرفتاری دے دی ہے۔

تفصیلات کے مطابق وزیر اعلیٰ حمزہ شہباز کی زیرِ قیادت پنجاب حکومت نے تاحال صحافی عمران ریاض کی گرفتاریوں پر خاموشی اختیار کررکھی ہے۔ اٹک کی عدالت نے حال ہی میں عمران ریاض کو مقدمے میں رہا کردیا۔

یہ بھی پڑھیں:

عمران ریاض کیخلاف مقدمہ، ایف آئی اے دفعات غیر قانونی قرار

رہائی ملتے ہی کمرۂ عدالت کے باہر جا کر عمران ریاض نے وہاں پہلے سے موجود چکوال پولیس کو گرفتاری دے دی۔ پولیس اہلکار معروف صحافی کو لے کر چکوال کی طرف روانہ ہو گئے۔

قبل ازیں اٹک عدالت کے فاضل جج نے چکوال پولیس کی جانب سے عمران ریاض کی حوالگی کی استدعا مسترد کرتے ہوئے پولیس افسران کو سرزنش کی اور کہا کہ آپ نے مروّجہ قانونی طریقہ اختیار کرنے کی زحمت نہیں کی۔

فاضل جج کا کہنا تھا کہ عمران ریاض کو چکوال پولیس کے حوالے نہیں کرسکتے، تاہم عمران ریاض نے چکوال پولیس کو گرفتاری رضاکارانہ طورپر دی۔ واضح رہے کہ معروف صحافی کے خلاف مختلف مقدمات درج کیے گئے ہیں۔

اپنے ایک حالیہ ویڈیو بیان میں صحافی عمران ریاض نے وزیر اعلیٰ حمزہ شہباز پر الزام عائد کیا کہ انہوں نے ایل ڈی اے سے میرے گھر کے نقشے منگوائے اور کہا کہ ہم نے عمران ریاض کا گھر گرانا ہے۔ انہوں نے ڈرون کیمرے بھیج کر ویڈیوز بنائیں۔