ملک بھر میں 7 روز کے دوران 31 اشیائے ضروریہ کی قیمتوں میں اضافہ ہوا

اسلام آباد: ملک بھر میں گزشتہ 7 روز کے دوران 31 اشیائے ضروریہ کی قیمتوں میں اضافہ ریکارڈ کیا گیا ہے جس کا اعتراف ادارہ شماریات کی رپورٹ میں سامنے آیا۔

تفصیلات کے مطابق وفاقی ادارہ شماریات کی مہنگائی کے اعدادوشمار سے متعلق ہفتہ وار رپورٹ جاری کردی گئی ہے جس کے مطابق گزشتہ 7 روز کے دوران 31 اشیائے ضروریہ مہنگی اور غریب عوام کی پہنچ سے مزید دور ہوگئیں۔

ادارہ شماریات کی جاری کردہ ہفتہ وار رپورٹ کے مطابق رواں ہفتے مہنگائی کی مجموعی شرح 32 اعشاریہ 82 فیصد رہی، اس دوران 31 اشیائے ضروریہ مہنگی ہوئیں اور صرف 9 اشیاء کی قیمتوں میں کمی ہوئی جب کہ 9 اشیاء کی قیمتوں میں استحکام رہا۔

ادارہ شماریات کی رپورٹ کے مطابق رواں ہفتے برائلر مرغی فی کلو 10 روپے 88 پیسے اور لہسن کی فی کلو قیمت 7 روپے 5 پیسے بڑھ گئی جب کہ دال ماش 6 روپے 6 پیسے فی کلو تک مہنگی ہوئی۔

یہ بھی پڑھیں:

عالمی سطح پر گندم کی قیمت میں کمی کا امکان، روس اور یوکرین میں اہم معاہدہ طے پاگیا

گزشتہ 7 روز میں ایل پی کا گھریلو سلنڈر 9 روپے 35 پیسے تک مہنگا ہوا، رواں ہفتے گندم کا 20کلو آٹے کا تھیلا 4روپے21 پیسے تک مہنگا ہوا جب کہ مٹن، مصالحہ جات، دودھ، دہی، بریڈ اور سگریٹس کی قیمتیں بھی بڑھ گئیں۔

ادارہ شماریات کے مطابق ایک ہفتے کے دوران ہائی اسپیڈ ڈیزل 40 روپے 57 پیسے، پیٹرول کی فی لیٹر قیمت میں 18روپے 49 پیسے تک کمی ہوئی۔

رپورٹ کے مطابق ٹماٹر 4 روپے 77 پیسے، کیلے 3 روپے 76 پیسے اور چینی کی فی کلو قیمت میں 39 پیسے کی کمی ہوئی۔

ادارہ شماریات کے مطابق رواں ہفتے سبزیوں گھی،گڑ، پیاز اور جلانے کی لکڑی بھی سستی ہوئی جب کہ بجلی، گیس اور ماچس سمیت 9 اشیاء کی قیمتوں میں استحام رہا۔